بد نصیب دن

 "سانحہ اے پی ایس"

عنوان : بد نصیب دن 

از قلم : کنزہ مریم 

دن سبھی ایک جیسے ہوتے ہیں۔۔۔صبح سے دوپہر،دوپہر سے شام اور شام سے رات۔۔۔اور پھر اگلے روز کا یہی چکر۔۔۔۔

لیکن دنوں کے بھی نصیب ہوتے ہیں۔۔جیسے ہم انسانوں کے ہوتے ہیں۔۔کبھی اچھا نصیب کبھی برا نصیب۔۔۔اور کبھی بہت ہی برا۔۔۔۔۔اور کبھی اتنا برا۔۔۔اتنا برا۔۔۔کہ انسان لفظوں سے بیان ہی نہ کر سکے اور ساری زندگی۔۔۔اس کی حد ہی نہ ناپ سکے۔۔۔۔16 دسمبر۔۔۔ایک سیاہ دن۔۔۔ہمیں اس سے برا لفظ نہیں ملا۔۔۔اس دن کو بیان کرنے کے لئے۔۔۔اور صرف سیاہ کا لفظ اس برائی اور ظلم کو بیان کرنے کے لئے بہت چھوٹا لفظ ہے۔۔

معصوم فرشتہ صفت بچے۔۔اللہ کے باغ کے پھول۔۔۔ان کے لئے تو چند لمحوں کی قیامت تھی۔۔۔جسے سہہ کر وہ جنت مکین ہو گئے۔۔۔اسکول کا وہ عملہ جو فرض کی ادائیگی میں ڈٹ کر کھڑا رہا۔۔۔وہ سب تو جنت مکین ہوئے۔۔۔۔سرخرو ہوئے۔ہمارے کل" پر اپنا "آج" قربان کر گئے۔۔۔لیکن یہ ظلم۔۔۔۔یہ بھلائے نہ بھولے۔۔یہ فرعونیت جو 16 دسمبر کے نصیب میں لکھی تھی۔۔۔۔اس کی یاد ہر 16 دسمبر کو تازہ ہو جاتی ہے۔

اور وہ والدین جن کے لخت کٹ کٹ کر گرے ان کے لئے ہر سال یہ دن قیامت کی صورت طلوع ہوتا ہے۔۔۔۔

اور باقی سارے دن۔۔۔اپنے ننھے مظلوم شہیدوں کی یاد میں۔۔۔۔ان ماؤں کی تڑپ۔۔۔۔ان کا دکھ کبھی ختم نہیں ہو سکتا۔۔نہ ہی ہم میں حوصلہ۔۔۔اور اہلیت ہے۔۔۔کہ ہم ان کے دلوں کو سکون اور قرار دے سکیں۔۔۔۔۔

افسوس ہے۔۔۔۔بہت افسوس ہے کہ ہم قیامتیں یاد کرنے۔۔۔۔خراج تحسین پیش کر نے کے لئے ہر سال کھڑے ہو جاتے ہیں۔۔۔ان بد نصیب سیاہ دنوں کو یاد کرتے ہیں مظلوں کے لئے شمعیں جلاتے ہیں اور ظالم پر دل کھول کر لعنت ڈالتے ہیں۔۔۔۔لیکن۔۔۔ہم سیکھتے نہیں ہیں۔۔۔۔کوئی سد باب نہیں کرتے۔۔۔۔کوئی پختہ ارادہ نہیں کرتے کہ ہم کیسے سدھریں اور کیسے سدھاریں۔۔۔کیسے محفوظ رہیں۔۔۔ کچھ نہیں سیکھتے اور کچھ نہیں سمجھتے۔۔

اگر سیکھ لیتے اور سمجھ لیتے تو آج ہم 16 دسمبر جیسے سیاہ دنوں کو نہ رو رہے ہوتے۔۔۔اتنی ماؤں کے کلیجے خون نہ ہوئے ہوتے۔۔۔

وقت تو اب بھی اپنا ہے۔۔۔آنے والے دن بھی وہی ہیں۔۔۔ویسا ہی چکر۔۔۔دن سے رات۔۔۔یہ قدرت کا چکر نہیں بدلا جا سکتا۔۔۔لیکن ان دنوں کا نصیب لکھا جا سکتا ہے۔۔روشن۔۔۔اور خوش۔۔۔تو وہ ایسے لکھ لیں کہ آج اگر ہمیں سیاہ دنوں کی سیاہی بیان کرنے کو الفاظ نہیں ملتے۔۔۔تو کل ان دنوں کی خوشی اور روشنی بیان کرنے کو ہمیں تمام روشن الفاظ کم اور چھوٹے لگنے لگیں۔۔۔

اللہ تعالی ہمیں یہ سب سیکھنے ،سمجھنے اور ایسے عمل کرنے کی توفیق دیں۔۔جو سیاہ دنوں کی تاریخ نہیں روشن اور اجلی کامیابیوں کی داستانیں بنیں(آمین )