"اسمٰعیل سے ذبیح اللہ"
عید الضحٰی حضرت ابراہیم خلیل اللہ، اور حضرت اسماعیل ذبیح اللہ کی یاد ہے۔ قربانی تو اصل میں رضائے الہی کا نام ہے۔
"مخصوص ایام میں ، مخصوص جانور کو اللہ رب العزت کی راہ میں قربان کرنا قربانی کہلاتا ہے"۔
تاریخ بتاتی ہے کہ کئی سالوں کی عبادت و ریاضت کے بعد جب اللہ پاک نے نبی ابراہیم علیہ السلام کو بڑھاپے میں بیٹا عطا فرمایا تو انہیں وہ بیٹا بہت پیارا تھا لیکن جیسے ہی وہ اتنا بڑا ہوا کہ خلیل اللہ کے ساتھ سعی میں شامل ہو سکے تو خدائے بزرگ و برتر جو ہر خواہش سے پاک ہے خواب میں اشارہ دیتا ہے کہ "اے ابراہیم ، اسماعیل علیہ السلام کو قربان کر دو۔"
نبی ابراہیم نے جب اپنے بیٹے نبی اسماعیل سے پوچھا کہ میں نے خواب دیکھا ہے تجھے اللہ کی راہ میں قربان کر رہا ہوں تو اسماعیل علیہ السلام بولے ابا جان آپ وہ کیجئے جس کا آپ کو حکم دیا گیا ہے اللہ نے چاہا تو مجھے صبر کرنے والا ہی پائے گا۔ والد نے اپنے جان سے پیارے بیٹے کو قربان کرنے کے لیے لیٹا دیا چھری چلا دی اللہ نے جبریل کو بھیجا کہ اسمٰعیل کی جگہ مینڈھا رکھ دو۔
کسی نے حضور نبی کریم صلی اللہ علیہ والہ وسلم سے پوچھا یہ قربانیاں کیا ہیں تو آپ نے فرمایا:
"تمہارے باپ حضرت ابراہیم علیہ السلام کی سنت ہے ۔ اور انکو خوش دلی سے اللہ کی راہ میں قربان کرو قیامت کے دن یہ اپنے بالوں، سینگوں اور کھروں کے ساتھ آئیں گی کل پل صراط پر یہ سواریاں بن کے تمہیں پار لگائیں گی۔"
جب کوئی شخص خوش دلی کےساتھ جانور کو رضائے الٰہی کے لیے قربانی کرتا ہے تو اس جانور کا خون زمیں پر گرنے سے قبل یہ عمل قبول کر لیا جاتا ہے۔
ایام نحر (قربانی کے تین دن) میں جو بھی صالح اعمال کیے جائیں فورا قبول ہوتے ہیں لیکن ان دنوں میں اللہ پاک کو سب سے زیادہ جو عمل محبوب ہے وہ اللہ کی راہ میں قربانی کرنا ہے۔ ان تین دنوں میں سب سے افضل عمل رضائے الہی کے لیے خون بہانا ہے۔قربانی کا کوئی متبادل نہیں ہے۔ اسلام تو نام ہی قربانی کا ہے عید قرباں کے ذریعے بھی ہمیں ایثار اور قربانی کا جذبہ سیکھایا جاتا ہے
قربانی کرتے ہوئے شوبازی سے بچیں ۔ قربانی کے جانور سے محبت کرنا، خیال رکھنا اسکو رنگ لگانا شوبازی نہیں بلکہ اصحابہ اکرام کا طریقہ کار ہے لیکن جو کسی وجہ سے قربانی نہیں کر پا رہے اور آپ جانتے بھی ہیں کہ اس مرتبہ استطاعت نہیں ہے تو آپ پر لازم ہے آپ انکو بنا محسوس کروائے خیال رکھیں اگر ہمارے معاشرے کو احساسات کی زبان سمجھ آ جائے تو کئی آنکھیں رونے سے بچ جائیں گی۔ راہ خدا میں اگر قربانی کرنے کی توفیق آپ کو عطا کی گئ ہے تو اپنے غریب رشتہ داروں کا خیال رکھیں انکے سامنے بار بار اپنے جانور کا تذکرہ نہ کریں۔ انہیں جتائے بغیر ان کے گھر بھی گوشت پہنچائیں اصل قربانی دن میں 4 وقت 40 دن مسلسل گوشت کھانا نہیں بلکہ اک وقت کھانے سے پہلے اپنے اردگرد دیکھیں کس نے نہیں کھایا انہیں خاموشی سے گوشت پہنچائیں تاکہ دل میں اخلاص اور پیار محبت کا جذبہ پیدا ہو۔ آپ 40 دن کھانے کی بجائے 40 گھروں میں پہنچائیں۔ یہ خیال نہ کریں کہ اس نے مجھے نہیں بھیجا میں اسے کیوں بھیجوں یاد رکھیں آپ اپنے عمل کے جوابدہ ہیں کسی اور کے نہیں۔ اب ہمارے ہاں عید قرباں کو ذوق و شوق سے منایا جاتا ہے اسے صرف ایک تہوار بنا دیا گیا ہے مگر جذبہ ایثار و قربانی کا فقدان ہے۔
اصل قربانی تو یہ جذبہ ہے کہ ہمیں احساس ہو جائے کہ اے اللہ ہم اک بھی لمحہ لگائے بنا تیری راہوں میں اپنا سب کچھ قربان کرنے کے لیے تیار ہیں۔
جو خالص بندہ ہوتا ہے وہ خلیل ہوتا ہے وہ اپنے اسمٰعیل کو ذبیح اللہ بنا دیتا ہے خدا کے ہر حکم پر گردن جھکا دیتا ہے۔
رب قرآن میں اپنے نام سے منسوب جانور کی تعظیم کا حکم دیتا ہے تو اپنے سے منسوب بندوں کو کیا مقام خاص عطا فرمائے گا.
یہ صرف تہوار نہیں بلکہ اپنی خواہشات کو راہ الہی میں قرباں کرنے کی تربیت ہے۔ یہ عشق خدا کا ایک عظیم نمونہ ہے۔
قربانی صرف جانور کی نہیں اپنے اندر بغض اور نفرتوں کی بھی کریں۔ جانور کی گردن پر چھری چلاتے ہوئے خیال رہے کہ آپ کی انا کا پہاڑ بھی کٹ جائے۔ جانور ذبح کرتے ہوئے اپنی بے جا خواہشات کی گردن پر بھی چھری چلائیں اگر ایسا نہیں ہوا تو ہم قربانی کی روح سے آشنا نہیں ہو سکیں گے۔
خلیل اللہ بننے کے لیے لازم ہے کہ اپنے اسمٰعیل کو ذبیح اللہ بنایا جائے۔
رضوانہ نور
تبصرے
ایک تبصرہ شائع کریں